Benvidas á Plataforma Feminista Radical de Galiza, un espazo de loita feminista radical comprometido coa defensa integral dos dereitos das mulleres. A nosa asociación traballa pola erradicación de todas as formas de opresión e violencia que afectan as mulleres na nosa sociedade, poñendo especial énfase na abolición do sistema patriarcal que perpetúa esas desigualdades.
Quen somos?
Formamos parte da Plataforma do Feminismo Radical de Galicia (PFRG), un espazo creado para unir asociacións e activistas do Feminismo Radical en Galicia. A Asociación Mulleres Abolicionistas Galegas (AMAG) xurdiu co obxectivo de proporcionar un respaldo xurídico á plataforma, xa que na actualidade non existe unha figura legal específica para plataformas como a PFRG. A nosa asociación permite dotar de personalidade xurídica á plataforma, asegurando a continuidade do seu labor e fortalecendo a súa capacidade de acción e representación na defensa dos dereitos das mulleres. Desde a súa creación, a PFRG interpelou a administracións, organizacións políticas e á sociedade sobre as múltiples ameazas aos dereitos das mulleres, loitando por unha axenda feminista que busca un cambio profundo e real.
A nosa loita
A nosa asociación defende unha axenda feminista que pon no centro ás mulleres e a liberación de todas as formas de opresión patriarcal. Esta loita abrangue diferentes frontes que consideramos esenciais para acadar unha sociedade máis xusta e equitativa:
- A eliminación do sexismo, tanto a nivel social, como laboral e educativo.
- A erradicación de todas as formas de violencia contra as mulleres, incluíndo a violencia machista e a violencia obstétrica.
- A abolición da explotación sexual, en todas as súas formas, como a prostitución, a pornografía e a trata de persoas.
- O fin da explotación reprodutiva, como os ventres de alugueiro e a doazón de óvulos.
- A abolición do xénero, que consideramos unha ferramenta de opresión e control patriarcal, que restrinxe as nosas vidas e as nosas capacidades en función de roles asignados polo sistema.
O manifesto da plataforma
A Plataforma do Feminismo Radical de Galicia naceu para unir esforzos de organizacións, colectivos e mulleres feministas de toda Galicia, co obxectivo de fortalecer a loita feminista na nosa terra. Móvenos a necesidade de ser vistas, escoitadas e tidas en conta como parte esencial da axenda política e social. Queremos ser unha voz unificada e potente, pero respectando sempre a independencia de cada colectivo e de cada muller que se sume a esta loita.
Poucas persoas hoxe dubidan da existencia do patriarcado como un sistema social no que as mulleres ocupamos unha posición subordinada. O feminismo, con máis de 300 anos de historia, acadou avances importantes, pero a igualdade real aínda está lonxe de alcanzarse. Por iso, non nos conformamos coa igualdade dentro do patriarcado; loitamos pola súa eliminación e por unha transformación profunda da sociedade.
Qué facemos?
- Activismo e sensibilización: Mobilizámonos, organizamos campañas e accións públicas para visibilizar as problemáticas que enfrontan as mulleres, desde a violencia machista ata a explotación sexual e reprodutiva.
- Formación: Impartimos obradoiros, charlas e xornadas para concienciar á sociedade e formar a institucións na loita feminista radical.
- Apoio ás mulleres: Proporcionamos axuda e asesoramento a mulleres que sofren opresión e violencia en calquera das súas formas, achegándolles recursos e apoio para atopar alternativas dignas.
Únete a nós
Convidámoste a unirte á nosa causa e formar parte deste movemento. Xuntas, podemos construír unha sociedade máis xusta e equitativa para todas as mulleres. Se queres saber máis ou colaborar, non dubides en contactar con nós.