1. Que é PFRG-AMAG?
PFRG-AMAG é a nosa entidade única que combina a Plataforma do Feminismo Radical de Galicia e a Asociación Mulleres Abolicionistas Galegas. Representa tanto a nosa identidade colectiva como o soporte legal que respalda as nosas accións e actividades feministas.
2. ¿A PFRG e AMAG son o mesmo?
Si! Aínda que ás veces usamos os nomes PFRG (Plataforma do Feminismo Radical de Galicia) e AMAG (Asociación Mulleres Abolicionistas Galegas), somos unha única entidade.
- PFRG é a nosa identidade colectiva como comunidade feminista radical.
- AMAG é a asociación rexistrada que respalda as nosas actividades e nos dá cobertura legal para operar.
Sempre asinamos como PFRG-AMAG para evitar confusións e reflectir que traballamos xuntas cun único propósito.
3. Como está organizada a PFRG-AMAG?
A PFRG-AMAG ten unha estrutura pensada para garantir a participación de todas as mulleres interesadas na loita feminista. Divídese en:
- Adheridas: Mulleres que asinan o manifesto e forman parte da plataforma, participando principalmente no Foro PFRG e recibindo comunicacións periódicas.
- Exemplo: Como adherida, poderás unirte ao Foro de Telegram e participar en debates sobre temas como a abolición da prostitución ou propostas para actividades locais.
- Socias de AMAG: Mulleres que asumen un compromiso activo e participan na toma de decisións, grupos de traballo e actividades da asociación.
- Exemplo: Como socia, podes colaborar redactando boletíns, coordinando accións feministas na túa provincia ou organizando campañas en redes sociais.
Ademais, no caso das socias contamos con:
- Grupos de traballo: Equipos especializados en áreas como redes sociais, boletíns, acción política ou redacción.
- Grupos locais: Organizacións provinciais en Pontevedra, A Coruña, Ourense e Lugo, para coordinar accións feministas en cada territorio.
- Asemblea de Socias: Espazo onde se debaten e votan as propostas clave para guiar a dirección da asociación.
4. Cal é a diferenza entre ser socia e ser adherida?
A diferenza principal entre unha socia e adherida é o nivel de compromiso e participación:
- Adherida: Formas parte de PFRG-AMAG asinando o manifesto. Podes participar no Foro de Telegram e recibir boletíns informativos, pero non implica un compromiso activo.
- Exemplo: Unha adherida pode propoñer ideas no Foro ou participar en debates sen asumir tarefas específicas.
- Socia: Das un paso máis, implicándote activamente nas accións e decisións da organización. Como socia, participas en grupos de traballo, accións locais e a Asemblea de Socias. Tamén requírese o pago dunha cota anual.
- Exemplo: Unha socia pode liderar a organización dunha campaña local ou formar parte do equipo de redes sociais.
Ambas figuras son importantes e complementarias na nosa loita feminista.
5. Non teño moito tempo libre, podo participar igual?
Por suposto! Como adherida, non tes obriga de participar activamente, pero sempre podes unirte a actividades puntuais cando che sexa posible. Se decides ser socia, tamén podes adaptar o teu nivel de compromiso segundo a túa dispoñibilidade.
Se xa es socia pero ves que non podes manter o mesmo nivel de compromiso, tamén podes pasar a ser adherida. Escríbenos a unete@mulleres.gal para facelo!
6. Cales son os obxectivos principais da PFRG-AMAG?
Os obxectivos de PFRG-AMAG inclúen entre outros:
- Abolir a prostitución, a pornografía e os ventres de alugueiro.
- Erradicar o sexismo en todos os ámbitos da sociedade.
- Eliminar a violencia contra as mulleres en todas as súas formas.
- Abolir o xénero como ferramenta de opresión patriarcal.
7. Que pasa cos meus datos persoais?
Sabemos o importante que é a túa privacidade. Os teus datos úsanse unicamente para xestionar a túa participación na PFRG-AMAG (boletíns, acceso ao Foro ou comunicación interna). Nunca compartimos información con terceiros e, se decides darte de baixa, eliminaremos todos os teus datos da nosa base.
8. E se quero deixar de ser adherida ou socia?
Se decides non continuar, só tes que enviarnos un correo a unete@mulleres.gal co asunto BAIXA. Sempre terás as portas abertas para regresar cando queiras.
9. Son home, podo formar parte da plataforma?
PFRG-AMAG é un espazo non mixto, creado exclusivamente para mulleres. Isto significa que só as mulleres poden participar como adheridas ou socias, xa que a nosa loita feminista pon o foco en traballar desde a experiencia e perspectiva das mulleres.
Porén, agradecemos o apoio dos homes que comparten os nosos obxectivos. Se es home, podes colaborar de varias maneiras:
- Compartindo as nosas convocatorias e difundindo as nosas mensaxes nas túas redes sociais ou círculos.
- Apoyando os nosos escritos asinando declaracións ou manifestos que publiquemos.
- Informándote e sensibilizando á túa contorna sobre as nosas causas e obxectivos.
O teu apoio é valioso para visibilizar a nosa loita e reforzar as accións feministas que promovemos desde PFRG-AMAG.